Baionawood - Itxaro Borda
Urtxoak pasatzearen eta Aviron Bayonnais errugbi taldearen garaipenaren aiduru dauden baionarrak urduri daude, lekuko zergen paperak eskuratu dituztelako: ehuneko 26,44-ez emendatu zaigu aurten Baionan bizitzeko eskubide taxa. Miarritze eta Angelun baino anitzez gehiago. Auzapez haserretuak argitu du hiritarren bi herenak ez direla zergagarriak eta nonbait atzeman behar duela sosa Jean Dauger kirol-zelaiaren handitzeko eta nehoiz irabazten ez duten jokalari profesionalen ordaintzeko. Jakina, beti pobreak dira erabaki inikoen errudunak.
Badirudi zenbakiak aztertzen ditugunean Hollywooden kokatzen garela. Baina ez da hala. Bazterrak miazkatzean Ekialdeko Europako hiri trastu baten bihotzean gabiltzala ematen du, bereziki euri edo laino trinko egunetako goizetan: zakar meta urrinduak espaloietan, zakur kakak denetan eta eskale ardozaleak ate kantoietan gaua bukatzen. Gainera ez da hemen politika kulturalik ere eramaten. Gauza segurra da, aberatsen egoitza altxarazten eta hauentzat agradagarri izatearren, Baiona munttotzen gastatzen dutela herritarren dirua, ez bestela. Ez bederen jende xeheen zerbitzuko.
Alta uste nuen sekulako uzta biltzen zutela aparkalekuekin.