Errekart - Itxaro Borda

Pier Pol Berzaitzek kudeatzen duen Beritza Konpaniak, Lur Berri enpresak eta Jean Errecart lizeoak manaturik Ze bolada! ikusgarria eskainiko du gaur Donapaleun. Musika, dantza eta bideoak bilduko dira mende erdiaz Oragarreko auzapez geratu zen gizonaren sortzearen ehungarren urteburua ospatzeko. Etxaian haziriko etxetiar ohia MRPko diputatua, senadorea eta kontseilari orokorra izan zen, 1971an Parisen zendu zen arte.





Amikuzeko laborantza, mekanizatzearen hildoan jarri zuen, Lur Berri kooperatibaren inguruan, etxegintza, piszina, klinika eta eskolaren eraikitzea halaber sustatuz. Bere herrian bertan, gurean hain zuzen, erremenbramendua eta nekezal espazioaren birmoldaketa olde kalapitatsuak akuilatu zituen. Nahi zuen ikasketez, ekonomiaz eta ausagailuez eskualdeko jende hemorragia geldiarazi. Lortu zuen azkenean, beste kantonamenduen aldean Amikuze nahikoa aberats agertzen delako jadanik eta ez bakarrik turismoari dagokionez.





Gerra ondoan ez bide zen erraza lekuko garapena aldarrikatzea. Adineko oragartar abilak, komunisten beldurra zainetan burbuilaz, hauteskunde baten atarian xuli hintzan eta golitu hiz erran zion, zuhurtzia laburraz bere oinarrizko ezadostasuna erakutsiz.


Berria.Info