Ho, Pittu, ho
Lanera atzeraka itzuliak garen aste honetan ez diogu makurrari makurrik erantsiko. Alabaina ez dugu aipatuko aburu ikerketa libre batek erakusten duela Sarkozyk iraila hasieran sei puntu galdu zituela jendetzaren bihotzetan. Erna bitez halaz opinionway-koak lehendakariaren ego hantuaren lasaitzeko.
Brad Pitt Donostian genuen igandean. Arrakasta erraldoia, ez dugu besterik entzun mugaz honaindiko irratietan. Ripley talentutsua zoriontsu eta esku-zabal ibili da tapiza gorriak zangopilatzen, zuzen den bezala. Egia erran, Parosen ginela gurutzatu genuen Braden itzala bai eta Madonnarena. Antiparosko arrantzale alegerak olagarroa errendarazten ari zela harri xabal baten gainean, kontatu zigun uhartean etxe animalea bazuela eta Cicionneak bere toy boy mukizuarekin irlaren zati handi bat erosi berri zuela. Gizonaren begiek olagarroaren ordez izar horien lepoa gogotik trenkatuko zukeela erakusten zuten.
Parikiako portuan erosi kontrabandako markazko betaurrekoekin gero kukuskatu genuen kapetut Brad Pitt ematen zuen adineko lehiatsu bat, Blue Star ferryan guztiak baino lehen sartu behar zuena. Signomi oihutzen zuen arranguraturik. Barregarria zen. Donostiakoa bezain.
Inglorious for ever.
Itxaro Borda