Pirinioetan murgildu da jada Korrika
Erribera eta Nafarroa atzean utzi eta gero, Pirinioetan murgildu da jada Korrika. Jende ugarik parte hartu du lehenengo bi egunetan.
TUTERA-. Korrikak atzean utzi du Erribera, eta nahiz eta gauean korrikalari kopuruak behera egin duen, goizean berriro jende andana batu zaio lasterketari. Erriberrin, Lergan, Oibarren... helduak, gazteak eta haurrak lekukoaren atzetik joan dira, ikasleak, langileak, Sasoia jubilatu elkartekoak...
Eguerdian Zangozara iritsi da Korrika, eta bertan jendetza zegoen zain. Herritik buelta bat eman du eta bertatik, eguraldi paregabearen laguntzarekin, Pirinioetarako bidea hartu du. Ledea, Irunberri, Nabaskoze, Erronkari, Izaba, Uztarrotz eta Otsagabia zeharkatu ondoren, gauerdirako Euskal Herriko herririk altuenera iristea espero da, Abaurreagainera, alegia.
Hunkituta Tuteran
Tuterako Herrerias plazan, 17.30ean ekin zion atzo Korrikaren 16. edizioak. Alizia Iribarren, Tuterako euskaltegiko irakasle eta Erriberako AEK-ko arduradunak hartu zuen lekukoa Edurne Brouarden eskutik, honek, hamar egun barru Gasteizen ezagutuko dugun mezua lekukoan sartu ostean.